صفنة زلف
ابالي ومدري شكثر؟
زتيتلك شوغة نفس
يمكن عمر !!
ولواهسك صفنة زلف
فوگ الوجن…
وجفوف اناطرلك تمر
غنيتلك "حن وانه احن"
گد الهوه
ذابحني بخدود السمر
گاعدلك اباب النجم
جا يمته مصباحك يطر
كون اليحبك بي ورد !!
جي حلگك ينگط ندى
والضاگك ينسم عطر
كونك تمر
وتمرغل بطينك طفل
واخذلي صمه بشفتي من خدك السايح خمر
سير علي وكتبها الك
كل روحي لجدامك شعر
كونك تمر
احآآآآ يبو شفايف حمر
جويني مستاحش جمر
عديت الك
واحد..عشگ
ثاني… اختنگ
ثالث اضن لا ما اعد
كلش خطر
فززني صافلك صدگ
وندهني واهس من تجي
خليني ارد حيل الامس ورجعلك بذاك "الزغر"
متواعد وياك بسمه
گاع الله مليانه بدغش
خايف يصوبونك "حجي"
وياخذنه الموادع نهر
خلينه نتباعد "شبر"
لا تسمع الوادم "عشگ"
وتمر "جذب"
وادمنه ما تعرف تحب
بس تعرف تشامر حجر
محتام اشمك ونتشي محتام ابوسنك حجي
شگد شايل بخدك شكر
افيييييش يا شوگك وطن
ربك بنه بطينك ضوه
مدري انته ضويت الگمر
الماي البشفتك حلو
خلف الله ما يدري النحل!!
لو يدري ابشرك لا تضل
مايك خطر
حل المشاكل ونتهي ووكف عله خدود السمه
نديها خايب شفتك
هنيال اليلوحك مطر
الشاعر علي كاظم الصبيحاوي