احــــــــــــــلام يـــــــــــــتيم
........احــــــــــــــلام يـــــــــــــتيم .........
صافن عل وكت من اني طفل زغير
كله من ظلمكم يلحراميه.
افكر باجر اكل لو اظل جوعان
لواكظيه خبزه وفوكه ميه.
واباوع امي محتاره وين تروح
وياباب التدكه وكله منيه.
وابويه من القهر صار الحزن مرساه
واذا نسمع ضحكته نفرح شويه.
اضل خايف انه من الامس لليوم
ومآدري باجر شنهو تاليه.
لا عيد اليجيني حتى انه افرح بي
ولا يقبل حزنه يغادر شويه.
شنو بس العراق الطفل بي محروم
واطفال الدول فرحانه يوميه،
اريد البس ملابس مثل كل الناس
واريد اكشخ وبدل وافرح شويه.
واريد اكعد بيت كله ازهار
وبيه طيور حب تغني صبحيه.
وتدرون شآريد بوسط ذاك البيت
اريدفراش انام عليه ليليه.
واريد العصر اتفرج على افلام الدمى
واحس نفسي طفل موجثه مرميه.
ومن يجي الليل اتعشى مثل الناس
من خضره وزلاطه وتكه مشويه.
واريد اتشرط على امي مثل ولد الخير
مآحب هذا يمه اشويلي بنيه.
واتمنى اكلهم اني شبعان
من اكل النساتل والدهينيه.
واذا جاني ابوي وكلي شبيك
اكله من الدلال اصبحت مابيه.
آآاخ هذا الي حجيته وسولفت بي
جان احلام بآحلام لان عايش بضل دولة حراميه.
ورغم كل ماجرى ومعتقد بيه سنين
اظل متأمل وحلمان بلكي من صدك نتغير شويه.
ارحموا بحالنه يلي اكلتوا سنين
خيرات العراق ونفطه وميه.